අම්මගෙ වාසගම කෙටුනා කජු ගලක

                   

අම්මා නැගිට්ටට තව නිදි	නැගෙනහිර
බත් පත උයා කුකුළත් අඩලනට	පෙර
මල්ලට කජු පොල්ල කටුවද	සිලිකවර
යන්නේ අලුත් අරගෙන වැඩපලට	දුර
සිලි සිලි කවර ඉරලා අත ඇඟිලි	බැඳ
පොරවා දෙදන පහළට බැංකුවක	හිඳ
ගල මත විසුරුවා අලු කජු තලන	සඳ
විස කිරි මුහුණ සිඹිනට උඩ	පනිනවද
තැලුවේ කජු උනත් හිත නිතරම	තැලිණි
ඉඳ හිට ලෙලි සමඟ මද කටුවට	ඇමිණි
කැඩුවා කියා අම්මට බැන ඒ	බැමිණි
දුන්නේ පඩිය රුපියල් සියයක්	පමණි
කජු මාළුවට උරුමය නැති ලිපක්	තුළ
ලෙලි ඇවිලුනා අම්මා ගෙට ආව	කල
උයලා බත් පතක් සහ මැල්ලුමක්	කොළ
කිරි ඇලි ඇති අතින් කැව්වා උනා	කෙල
පොල් අතු සෙවිලි යාලත්තේ මැටි	පැලක
අම්මගෙ වාසගම කෙටුනා කජු	ගලක
බත් පත සැදූ දුප්පත් පොඩි	පැල්පතක
පින් බිම මෙයයි එය මට විතරද	මතක